கற்க தமிழா

மரணித்தவர்களின் வீடுகளைக் கதைக்களமாகக் கொண்டு படைக்கப்பட்டிருக்கும் இந்த 13 கதைகளும் சிறுகதைத் தொகுப்பு என்ற ஒற்றை வார்த்தையில் கூறிவிட முடியாது. ஒவ்வொரு கதையில் வரும் திருப்புமுனைகளும், முடிவுகளும் நமக்குள் பல கேள்விகளை எழச் செய்கின்றன.

வழக்கமான முறையில், பெண்களுக்கு ஆண்கள் தான் எதிரி என்று பெண்ணியம் பேசாமல், பெண்களுக்கு பெண்களே எதிரி என்று உண்மையை உடைத்து நெற்றிப்பொட்டில் அடித்தாற் போல் எழுதியிருக்கும் இவரின் எழுத்துக்களை அவ்வளவு எளிதாகக் கடந்து செல்ல முடியவில்லை.

இதிலுள்ள ஒவ்வொரு கதையிலும் மரணித்தவர்களின் வீட்டுச்சூழல் வெவ்வேறாக இருந்தாலும் பாதிக்கப்பட்டவர்களின் மனவேதனைகள் ஒன்றே. புரட்சிகரமான வார்த்தைகளால் கதையியின் போக்கை சோர்வு ஏற்படா வண்ணம் சிறப்பாக இந்நூலை படைத்திருக்கிறார் ஆசிரியர் ஆமினா முஹம்மத் அவர்கள்.

கிராமப் பின்புலம் கொண்ட பெண்கள் சிலர், இன்றளவும் சூழ்நிலைகளாலும் சந்தர்ப்பங்களாலும், பொருளாதார அடிப்படையிலும் மற்றும் பல காரணங்களாலும் பின்னப்பட்டு அதில் சிக்கித் தவிக்கிறார்கள் என்பதை மறுக்க முடியாது. இதனைத் தன் கதைக்களத்தில் வெளிச்சம் போட்டு காட்டியிருக்கும் ஆசிரியருக்குப் பாராட்டுகள்.

என்னதான் ஆணுக்குப் பெண் நிகர் என்றும், பெண் சுதந்திரம் என்றும், பெண்ணியம் என்றும் பேசுகின்ற நவீனமயமான இக்காலகட்டத்தில் எல்லா துறைகளிலும் கால் பதித்து அதில் வெற்றியும் பெற்று சிறந்து விளங்கிக் கொண்டிருக்கும் பெண்களின் மற்றுமொரு கறுப்பு பக்கமே இந்த "ஆகாத தீதார்" எனும் சிறுகதைத் தொகுப்பு.

இவ்வளவு ஏன், விண்வெளிக்குச் சென்று சாதனை படைக்கும் பெண்கள் வாழும் இவ்வுலகில் தான் தன் தலைமுடியை எவ்வளவு நீளம் வைத்துக்கொள்ள வேண்டும் என்று தன் தாயிடமோ அல்லது கணவனிடமோ அனுமதி கேட்பது இன்றளவும் பல வீடுகளில் இருக்கும் பெண்களின் நிலை.

பிறர் பேசத் தயங்குகின்ற உணர்ச்சிமிக்க, பரபரப்பான விஷயங்களை துணிச்சலான எழுத்துக்களால் தன் படைப்பின் மூலம் வெளிப்படுத்தியிருக்கும் ஆமினா முஹம்மத் அவர்கள் மென்மேலும் பல படைப்புகளை வெளியிட இறைவனைப் பிரார்த்திக்கின்றேன்.

இந்நூலில் என்னை ஆட்கொண்ட வாசகங்கள்: